Wis 14

Ngode Datagaliwabehanda Noanaga iba talu mo bayale halu mbirale irame wabini wiaru ho gingiru lo wahai hene

1 Agali mbira ibugua iba li timbuniore wiyagola iba taluha anda pole hene. Ani howa pigane ira tigini mbira wiagohondo ibu bayale holiya biamogo bia lalu bi lamini. Anigo ai ira tigini ogoni ibu hongo nahe. Ibunaga hongo iba sibi agali ogoni ibu yalu polebiragobi ndo nga. 2 Agali mbira ibu yolo mulenaga iba sibi wabulenenaga bebani wabu wini. Ani bu wiagola agali manda bayalewi heago ibugua iba talu wabini. 3 Anigo ainde Aba-o í̠na iba sibi ibu iba hanuni hariga ogodagua pelo lalu baya hanguore handaya ho haga ke. 4 Agali manda nabi heaguabi ibugua iba sibi baya hangu yalu polebirago irane í̠na ibu biamogo beregola yalu polebira. 5 Ainde mbirale bibahende í̠naga mini gigabi ibugua wabini ngago damene bibahendeme tininaga biabe bulene ngago bigi bigi bialu helo hamelo ke. Ani manda bidegome wali agali tigua gi nahe bameore ira mbalapayabi ngagoria biralu iba solowara timbuni bedagoria pialu mo ko halu iba nai nahe bayale ange mendehayagi anda piaga. 6 Bamba bambaore agali luoreni timbu gibiore heneya. Ti mine halu balagala halu heagome tini homai halu ereba hai henego mbiraore hangu homa nabi bayale heneya. Ibu hangu bayale howa wali agali hameigini tara tara mani henerunaga mamali ho aribia heneya. Ibu iba sibi í̠nime handaya ho heneyagoha biruyu ibagabu heneya. 7 Ngode Datagaliwabe-o í̠na iba sibi ogoni agalime irame wabiyago mo bayale harigola ai iba sibi ogonime biamogo biyagola mana tigabi bulene ibu bolangua heneya. 8 Heneneore mbiralime bi pupu wulenaga irame bigiya wabu wiyagua nde ibugua gime wabu wiyago mbiralime mo ko harangi ibuni heba mo ko holene wulebira. Ibuni heba mo ko holene wulebirago irane agali ogoni ibugua gime wabinihondo bi pupu wiaga ogoni wabu wiyagome ibu mo ko holebira. Ai mbirale abale mo ko halu goba haga ngago bi pupu wiaga bayale lalu kemigome ibubi mo ko holebira. 9 Ngode Datagaliwabehanda wali agali ko biaga karubi tigua biabe ko bu ngarubi hame nalagaore ka. 10 Ani howa ibugua wali agali uruni heba tinaga biabe ko bini ngarubi bibahende bo haealabaga bu wahai holebira. 11 Anidagua bialu Ngode Datagaliwabe ibuni ibalu wali agali Ngode Datagaliwabe yutiga nabiaga bu karu heba tinaga bi pupu wiaga ngaru heba bo haealabaga biai holebira. Heneneore Ngode Datagaliwabehanda mbirale bibahende ngaru wabiai henegoyu ainde wali agali tigua mbirale uruni mo ko hai halu mo nagalone halu ka. Mbirale urunime wali agalinaga mini mo luluya haga nga. Mbirale uruni wali agalime ibaha wena minule wena nu wiagadagua ngago urunime wali agali lulu karu minai holebira.

Gime wabinigohondo bi pupu wulenenaga tene ogo

12 Agalime bi pupu wulenaga irame wabiyangi Ngode Datagaliwabe erembira mulene mana heyini. Wali agali tiniha mo ko holenebi ogoningi dege anda íbu wini. 13 Bambaore mbirale bi pupu wule gime wabini uruni ale nawini. Ani bialu manibi ani wiaabo naholebira. 14 Wali agali tinaga mine hagane maname mbirale bi pupu wiaga uruni dindi ogoria wabu winiya. Heneneore mbirale bi pupu wiaga gime wabini uruni abaleore ereba hai holebira.

15 Horo mbirungi agali mbira heneyago ibu igini abaleore homo tungulo miyiya. Ani homayagola igiri aba biagome ibu iginiore dara timbuni howa igiri ogoninaga mbirale mbira gime wabiyiya. Ani wabuwa ibu igini abe dege homayagohondo bi pupu wiyiya. Ani buwa ibu ilili bulene manabi bi pupu wulene manabi tara tara wabuwa ibu waneigini aguaneru mani holobadaru tigua taluwa bialu helo wabu wini. 16 Maniore howa mana ko ogoni pu hongo halu mo mana helene. 17 Wali agalime gime wabini uruni ale ngagohondo bi pupu wilimu lalu agali haguane bu hearume bi hongo howa laga hene. Ai tinaga agali haguane dindi kaundiaha kagola wali agali tigua dengui handalu ibunaga mini yaraga hole ibabe nahe kaundiaha haragola tigua gime wabini agali ogoni handalehe wabu wiaga. Ani wabu ngelowa tigua agali haguane ogonihondo bi laradagua ibunaga bigiya ogonihondo bi lalu mini yaraga holenaga gime wabini ogoninaga mini yaraga halu hagaya. Agali haguane tigua ogonidagua bilimu lowa hongo haabo haga winiya. 18 Agali gime uruni wabiaga karu tigua nde ogoni tinaga gi biyinaya winidagola tiguabi hongo howa wabu bila howa yolo migi biagaya. Ai tinaga biyinaya manda bialu wabiragola ogonime bi pupu wiagane mana ogoni pu timbu hene. Anidagua biragome wali agali maru tinaga agali haguane kago manda nabi bu karume bi pupu wiagane mana ogoni talialu haga hene. 19 Agali deme hondolene uruniale wabiaga kago ibugua ibunaga agali haguane kagonaga wabero lowa ibunaga agali haguane kagome hondowa turu helonaga bayaleore wabiaga. 20 Anigo áyu wali agali bibahende deme hondolene baya uruni turu hai ho ka. Bamba howa tigua tinaga agali haguanerunaga mini yaraga haga winigo ai áyu uruni tinaga bi pupu wulene nga. 21 Anidagua biragome wali agali mohondo halu genda tara tara mo miaga nga. Ani bialu agali haguane bu karunaga bi laragome wali agali mo luluya halu ege to̱le̱ ngarubi ira tigini ngarubi tinaga bi pupu wulene urunihondo lolene nga lagane ka. Tigua ogonidagua binidago bamba Ngode Datagaliwabehanda tihondo lamialu mbirale mbira bi pupu wule gime nawabibe lenego mo wahene.

Mbirale gime wabini ngagohondo bi pupu wialu kago mana ko ngagonaga tene ngago ogo

22 Wali agalinaga miniha mo luluya hai heagola tigua Ngode Datagaliwabe ibuni ai kabe manda nabiore ka. Mani howa ti pu luluyaore halu tinaga lulu mana ogonime tininaga minibi holenebi mo libilaba lalu mo luluya dege henego ka. Tinaga embone gengedai henego howa tigua lalu, Mana ko bulene ngagome holene bayale awadaga mo yu anda ibaga, lalu ka. 23 Tigua bi pupu wiaga maru ngaruha tinaga waneigini homelo bagane ka. Ani bialu tigua bi pupu tara tara lalu iba gana ko tagabi tara tara ngarubi mana ko tara nahendene ale tara ngarubi bialu haga ka. 24 Ani bialu howa tininaga dabubini mana ngagobi holene bayale ngarubi mitangi nahaga ka. Ani howa agalime agali mende kago mohondo halu ohowa homelo bo wahaga ka. Agali ko biaga urunime agali mendeali one bedago ti kayu bialu haru paluwa wali ogoni ibu agalini kago mo taga haga ka. 25 Wali agali uruni ti daluha mana ko tara tara wu to̱leda. Tigua agali bameore homelo bo wahaga bialu mbirale mendealinaga ngaru mo page bialu maru karu mohondo haga bialu haga ka. Tigua mana bayale bialu holene ngago wahalu habo nalolene bi lowini ngaru pugualu piai haya. Tigua agali maru karu wai bilo mo bia halu mbirale mbira bule lalu bi lo wiyago nabi wahalu piaga ka. 26 Tigua agali bayale karu gililo yu pialu agali mende ibugua biabe bayale bini ngago mo embeda haga ka. Wali agali tigua mana bayale bini ngaru geme hengedo wahai haga ka. Agali dege dege mana ko tagabi ngaru bialu howa dabubini mana ngago puguaga ka. Dabubini mana pugualu puwa wali agali kayu bima ibaga dege biaga ka. 27 Mbirale bi pupu wule gime wabini ngagohondo bi pupu wiagane mana ngagome ko damene ngago mo yu anda ibagane hariga ogoni nga. Mana ogonialeme ko tara tara ngaru mo anda halu mana ogoni aleme wali agali ko mana ko uruni talima piaga karu biba helalu ereba helaga nga. 28 Wali agali mbirale bi pupu wule gime wabini urunihondo bi pupu wiaga karu ti lulu taraore yu ibaga bu haga ka. Tigua mbiwia harama lowa ke̱ dewa halu mana nabulene lehe ngaru bialu haga ka. Ani bialu howa tigua mbirale mbira buleore lalu bi lo wiyagua nde bule layago henene bule ndo nabi wahalu piaga ka. 29 Tigua mbirale bi pupu wule gime wabini uruniha holene nahe ema nabiaga bameore ngarume tiha genda nangulubada lo manda bialu tigua mbirale mbira buleore lalu gi dolalu lo wirago nabi wahalu piaga ka. 30 Anigo tigua Ngode Datagaliwabe kago manda nabi tinaga miniha mo luluya hene kago ainde horo mbirungi tiha genda anda ibulebira. Tigua mbirale gime wabini dama mitangi bialu bi pupu wiaga ngaruhondo bi pupu wialu howa mana tigabi ngago bame dege nga lo manda biaga. Ani manda buwa tigua wali agali karu mo hondo howa mbirale mbira buleore lalu gi dolalu ke̱ howa lo wulene karulape lo manda biaga. 31 Agali uruni tigua mbirale dama mitangi bialu bi pupu wule gime wabini uruninaga minini howa henene ore bulego laro lowa gi do lalu bi lo wiaga. Mbirale bi pupu wiaga urunime tigua mana ko biragonaga pani namiagago ainde mo ko holene ngagome tiha ngola haabo holebira. Ani bulene ngago irane wali agali mana ko biaga bu karu tiha pani nelo mulene tigabi ngadaguaore miaga ngagome ani mulebira.